Awor ku a drecha e barku i tur investigashon n'e nave ta tras di lomba,...(More)

Awor ku a drecha e barku i tur investigashon n'e nave ta tras di lomba, SeaMac II ta bandoná DOK pa sigui su kurso. Awe tardi por a mira e barku sali for dje astiyero i bai bunker, esta tank na altura di Batipaña, pa despues hasi un testtrip pa determiná si e por subi laman ganchu sin problema. Bunkering di un barku asina ta tuma mas o menos 5 ora i komo tal e barku lo bandona haf di Kòrsou mas anochi. SeaMac II ta parti di un kapítulo hopi skur den historia di DOK i varios kas di famia na Kòrsou. Tur hende por kòrda kon sèptèmber 2007 a surgi un eksploshon grandi riba e barku ku tabata pa reparashon den DOK. Komo konsekuensha dje aksidente sinku yu di Kòrsou a pèrdè nan bida al instante. Resultado dje investigashon ainda no a keda publiká i asina hopi pregunta a keda sin kontesta pa famia dje defuntunan. Tripulantenan di SeaMac II mes a keda ku masha trouma despues dje suseso ku a shòk e komunidat di Kòrsou. Awe mester bisa sinembargo ku tur trabou di reparashon ta tras di lomba i tambe e investigashon ku a hasi riba e nave, di manera ku SeaMac II ta preparando pa bandoná haf di Korsou. SeaMac II a keda konstrui na Rotterdam na 1981 i ta propiedat dje kompania South East Asia Marine.(Less)