Konstrukshon di Curaçao Palapa Resort na Caracasbaai a drenta un fase nobo i...(More)

Konstrukshon di Curaçao Palapa Resort na Caracasbaai a drenta un fase nobo i ya por mira loke mester bira e promé kambernan dje kompleho turístiko riba e tereno. Despues di trabounan grandi pa dèmpel parti chikí di Caracasbaai i reforsá e tereno, por bisa ku e trabounan di konstrukshon dje edifisionan mes di loke mester bira Palapa Resort aki ratu, a start. Henter area di Caracasbaai ta pasando dor di un metamorfosis kompleto. Ya kaba a renobá e kaya ku ta kondusí p'e area, drecha e beach ku kapa di santu nobo, pone sitionan pa stashoná outo, konstruí entrada di loke mester bira un marina nobo pa yate den e area i hopi mas. Anto mei-mei di tur esaki por mira Palapa Resort ta reis. Awor si e konstrukshon ta avansá di tal manera ku propietarionan dje kompleho a duna di konosé ku pa fin dje aña aki mes nan lo por kuminsá hür e promé kamber i apartamentoan di Palapa Resort. Algu positivo di Palapa Resort ta ku e playa ta keda asesibel pa públiko ora e kompleho keda kla. Dje forma ei ta mantené e karakter úniko di Caracasbaai kaminda diariamente hopi siudadano ta akudí ku nan famia pa enkuentronan ameno kantu di laman. Djis p'ariba di Carcasbaai, pa ta mas eksakto na Barbara Beach n'e entrada di Spaanse Water, tambe tin un kompleho turístiko impreshonante den konstrukshon. Ta trata aki di Curaçao Hyatt Resort. Konstrukshon dje kompleho aki ta avansando hopi rápido. Ya kaba por mira partinan di fèrf kaba i lo no dura masha pa e hòtèl di sinku strea aki tambe habri su portnanan. Porsierto ku Hyatt lo bira e hòtèl mas grandi na Korsou ku 350 kamber i apartamentu. E ta disponé ademas di un kancha di gòlf i diferente fasilidat mas ku por hasi kualke otro doño di hòtèl yalurs. Tur kos ta indiká ku Curacao Hyatt Resort lo habri su portanan otro aña. Unabes kla, Palapa Resort, Curacao Hyatt Resort i tambe Renaissance Hotel ku ta den konstrukshon riba Rif net den porta di haf lo yuda aliviá e skarsedat serio di kamber di hòtèl ku Kòrsou ta konfrontá. E kresementu turístiko ta bai dje rápido ei ku okupashon promedio di hòtèlnan na Kòrsou pa un tempu kaba ta riba 90 porshento. Un problema pues di luho.(Less)